الندم على الخطأ شيء إنساني وأخلاقي بامتياز...
لأنه دليل على وجود خير في نفس الإنسان يخليه يعترف بتقصيره وخطؤه، ويترجم الشعور ده لندم وتوبة...
مفيش حد مننا مرتكبش أخطاء في حياته...إحنا مش معصومين...
لكن الفارق بين الإنسان المنصف والمتكبر هو في الاعتراف بالخطأ ومحاولة تداركه قبل ما يكبر ويكبر معاه القبح والسوء في نفسه..
العاقل هو اللي يعرف حقيقة نفسه وضعفها، ويعترف بالضعف في نفس الوقت اللي يجتهد فيه لمحاولة علاجه وعدم تكراره...
أما المنساق لأهواؤه وشهوات نفسه هو اللي بيكابر ويعاند ويرفض الاعتراف!
الندم لفتة إنسانية وصرخة داخلية في وش الظلم اللي بيجنيه الإنسان على نفسه...
عشان كده في النصوص الدينية كتير منها بيحمل معنى إن الندم في حد ذاته توبة ، لو كان صادق فهيترتب عليه مغفرة الذنب...
وعشان كده الندم لحظة صدق ومكاشفة للنفس أمام نفسها...
واعتراف بالتقصير في عمل الخير إما مع النفس، أومع الله، أو مع الناس...
والندم عشان يكون مفيد للإنسان ضروري ييجي بعده سعي حقيقي واجتهاد للإصلاح وعلاج الثغرة اللي خلت الإنسان يضعف.