geetmark

بنحلم دايمًا بالحرية وبننادي بيها
تاريخنا مليان بطولات لناس ضحوا في محاولات الاستقلال
من أول الاحتلال الصليبي والمغولي مرورًا بالفرنسي والبريطاني
كان كل احتلال منهم له جيش وعساكر وسلاح
معروف إنهم اعداءنا اللي بنتمنى اليوم اللي نشوف أرضنا خالية منهم
بنحاربهم ونبذل كل غالي علشان بس نعرفهم إن أرضنا ملكنا وعمرها ما هتبقى ليهم وعمرنا ما هنقبل احتلالهم لينا
بس للأسف الاحتلال اللي بنواجهه دلوقتي أصعب والحرب أشرس وأقوى
حرب جيشها مكون من مجموعة من الأفكار الخاطئة اللي بتستخدم كل سلاح من فن وإعلام وأدب ورياضة وحتى أكل وشرب
حرب خلت مجتمعاتنا تستقبل المحتل وتفرح بوجوده فكل بيت
خلت كل بيت فيه جندي على الأقل من جنود الاحتلال اللي بينادي بأفكاره المادية الغير إنسانية
بالظبط زي الدور العبقري اللي عمله الفنان (محمد الصاوي) في فيلم (ليلة سقوط بغداد) لما فضل يتمنى الاحتلال الأمريكاني بحجة إنهم (هينضفونا) وحتى لما قتلوه أعلن "مش قولتلكم هينضفونا"!
انبطاح تام للعدو وتسليم كامل له وتعاون مطلق مع المحتل وفر عليه حتى تمن الرصاصة
الغزو الفكري الغربي بشع والاستسلام له خيانة لإنسانيتنا وحضارتنا وعدم الانتباه له حماقة والانتصار عليه أمر طبيعي ومنطقي بشرط إننا نوعى ونوعي ونواجه