واخدين بالكم إن الإختراق جاي من ناحية القلب مش العقل؟!

الجماهير مش مؤهلة للتأمل ومش كتير اللي بيفكر ويفلتر أي كلام يسمعه بل المعظم بينفعل ويتعاطف بسهولة..
المعظم بيحكم على الأمور بشكل سريع ومعندوش الطاقة النفسية للصبر وبناء دليل.
علشان كدة مادة أي خطاب إعلامي عايز يوجه الناس بتكون مادة عاطفية تتصدق بسرعة وبعيدة عن العقل.
لو الإعلام عايز تصالح مع حد هتلاقي نغمة المسامح كريم وعفا الله عما سلف وربنا بيغفر..
ولو عايز يقصي نفس الحد هتلاقي نغمة العدل سيف على رقاب الكل وتسقط الواسطة والمحسوبية..
ممكن يكلمك عن حتمية التغيير لو فيه حاكم معين مش عاجب..
وممكن يوعيك بحتمية الاستقرار لو الحاكم ده اتغير بواحد على المزاج رغم انه بيتبع نفس سياسات اللي قبليه.
واللي يركز مع الإعلام هيلاقيه عنده القدرة على إقناع الناس بالشئ وعكسه على حسب الاتجاه اللي عايز الناس تمشي فيه..
واللي يركز معاه أكتر هيلاقيه بيصيغ اللي عايز الناس تأيده أو تعارضه بشكل عاطفي مبسط وفي قوالب أفكار مقبولة عند الناس..
محتاجين ماسورة توصل الكلام من قلوبنا لعقولنا، ومحتاجين فلتر يفلتر الكلام بالعقل قبل لما يوصل للقلب.