#كبسوله تربوية !!

- اسمها "حضرتك" مش "انت"
- اسمها "نعم" مش "ايه"
- وطي صوتك
- ماتحطش رجل على رجل قدام حد كبير
- ماتبقاش قاعد و سايب حد كبير واقف
- اقف بعيد عن الباب
- متتصلش بحد متأخر
- اقعد على الكرسي اللي مش كاشف البيت
- ماتزعلش حد في بيتك
- خبط على الباب قبل ما تفتحه
-كل من ناحيتك و ابعد الطبق عنك شويه
- قوم اول واحد من على الاكل لو معزوم
- استنى كلهم يقوموا لو انت اللي عازم
- متزورش حد فجأة
- تدخل بيت حد تبقى اعمى و تطلع اخرس
-في بيت غريب ماتقومش من مكانك غير لما حد يقولك
- اقفلي رجلك و انت قاعده
-افرد ضهرك و انت قاعد
- انزل مع اختك خد بالك منها
- سيب الزفت التلفزيون ده قوم صلي و تذاكر
- تعال رايحين نعيد على قرايبنا
- روح ودي دي لجارتنا و قولها ماما بتسلم عليكي
- شيل من عمو الاكياس دي
- قوم خلي طنط تقعد
- ماتطلعش ورا بنت السلم يا تطلع قدامها يا تستنى شويه و تطلع
- لو حد طالع وراكي اقفي في كورنر السلم عديه و بعدين اطلعي
- انت مش احسن من حد ولا حد احسن منك
- ماتقارنش نفسك بحد
-قول شكرا قول اسف اللي يعتذر الاول هو الاقوى
- ما تشدش حاجه مش بتاعتك من ايد حد
-ماتسبقش حد كبير و انت ماشي
-افتح الباب للكبير و للبنت
- باب مقفول تخبط حتى لو عارف ان مافيش حد
- قول الحق ولو على رقبتك
- لبس النادي ده مينفعش يتخرج بيه
- لبس البيت غير لبس النوم
- عيب دا اكبر منك
- دا حرام ويغضب ربنا
- سيب اللي ف ايدك وقوم صلي الاذن بيأذن
- اوعا تعاير حد او تقلل منه
- لو شوفت حد مسكين ومحتاج اقف جنبه اوعا تتخلي عنه
- اجبر بخاطر غيرك وحب الخير لغيرك
- بطل دوشة الناس نايمة
- خليك ف حالك متتدخلش ف خصوصيات الناس غير ف الخير
- متخليهمش يدفعوا .. ادفع انت
- مترميش حاجه في الشارع
- نضف مكان مبهدلت
- متجيش ناحيتها دي أمانة

الناس المحترمين ولاد الاصول زمان كانوا بيربوا اولادهم كده ف لو عايزين خير و بركة زمان ترجع لازم نربي أولادنا كده !!
??