* أزاي تنظمي وقت ابنك بعد يومه الدراسي

-حاولي تكوني خلصتي تحضير الغدا قبل ما يوصل البيت.

البيت يكون مترتب لأنه بيدي راحه نفسيه سواء للكبير او الصغير.

- سيبي أبنك يرتاح شويه من مجهوده ف المدرسه بس ف رأيي بلاش ينام بالنهار عشان ينام ع الساعه 9 بالليل و يكون ده ميعاد نومه الثابت.

- اسأليه عملت أيه ف المدرسه طول اليوم عشان ميجيش وقت المذاكره يقعد يقولك ماما ده حصل كذا و كذا .

- لو بياخد دروس بلاش يكون بعد المدرسه ع طول عشان يركز.

- طبعا أبنك أكل و شرب و أرتاح و جه وقت المذاكره و خلاص مفيش حجج تانيه.. هو فاضله حجه واحده بس . دي خليه يخلصها قبل ما يقعد يعمل الواجب .

- وقت المذاكره:-
ياريت بلاش تليفزيون مفتوح و دوشه جنبه و ناس قاعده بتتكلم أكيد الولد مش هيركز .

- ظبطي مكان مريح و عوديه يكتب ع مكتب بلاش السرير و الأرض عشان الخط يبقى مظبوط..

- بيعمل الواجب و كتب بخط وحش امسحي الواجب و يتعاد عشان يتعود أنه يتقن اللي بيعمله و تقولي له :-
أن رسولنا الكريم اللهم صل وسلم و زد و بارك عليه قال فيما معناه إن الله يحب إذا عمل أحدكم عملا أن يتقنه .

- بلاش تعيشي دور مرات الأب و تضربي ف الولد عشان مفهمش اللي بتشرحيه

- مفهمش مش مشكله عيدي مفهمش تاني يبقى انت مش عارفه توصلي المعلومه و شوفي طريقه تانيه وصليها له بها.

- لو مفهمش بردو خليه يقوم من المذاكره ياخد راحه خمس دقايق .

- ذاكري له اي ماده تانيه و أرجعي للماده اللي مكنش فاهمها و اشرحيها تاني.
بس بالله عليكم بلاش عصبيه ف المذاكره
وبلاش يا غبي و يا حمار و الكلام ده لانك كده بتقنعيه انه غبي مره ع مره هيصدقك و يستسلم و يبقى غبي بجد .

- لو ابنك بيتحرك كتير خليه يذاكر ع مكتب و وشه ف الحيطه مفيش شباك ولا صوره ولا تكون الحيطه مليانه الوان كتير يعني متخليش حاجه تجذب انتباهه.
اللي بتذاكريه مع ابنك خليه هو يشرحه لك أديله ثقه ف نفسه و انه يعتمد عليه يقدر يفهمك الدرس .
أديله أي حاجه ف أيده و مثلي معاه أن ف أيده ميكرفون و أنه بيتكلم ف الإذاعه .
خليه يمثل دور المدرس و يسألك و أنت أعملي مش عارفه الحل و تسأليه و خليه هو يجاوب .
بين كل ساعه مذاكره اديله عشر دقائق راحه.
ابتدي معاه بمذاكره الماده الصعبه بالنسبه له.
قولي له أنت شاطر -أحسنت - بارك الله فيك أحضنيه و بوسيه و طبطبي عليه الكلام ده بيفرق مع الأطفال جدا .
ياريت لو في خروجه أخر الأسبوع كنوع من التحفيز
خليه يستمتع بوقت مذاكرته معاكي وصليه لدرجه ان هو اللي يطلب مذاكرتك معاه
و سيبي الواد متعلنيش عليه الحرب .

أوعي متحفظهوش القرأن داومي ع تحفيظه كل يوم .
علميه القرأن والقرأن هيعلمه كل حاجه .

اللهم علمه الكتاب و الحساب و قه العذاب (رسولنا الكريم اللهم صل وسلم و زد و بارك عليه كان بيدعي الدعاء ده لسيدنا معاويه رضي الله عنه و عن الصحابه أجمعين ).